مانويل التانى بالايولوجوس
From Wikipedia, the free encyclopedia
مانويل التانى پالايولوجوس - Manuel II Palaiologos باليونانى: Μανουήλ Β΄ Παλαιολόγος - ( بيزنطه، 27 يونيه 1350 - بيزنطه، 21 يوليه 1425 )، قومندان عسكرى و سياسى و امبراطور الدوله البيزنطيه من 1391 ل1425. بدبلوماسيته قدر يعمل علاقات سلميه مع الاتراك العثمانليه طول فترة حكمه فأخر استيلاءهم على قسطنطينيه لمدة خمسين سنه. اتعرف بتدينه و حبه للثقافه و الادب. و هو الامبراطور اللى استخدم بابا الكاتوليك بينيدوكتس الستاشر Benedictus XVI نص ليه اتاخد على انه ضد الاسلام فى محاضره القاها فى جامعة ريجينسبورج Universität Regensburg فى المانيا فى بداية عهده فى 12 سبتمبر 2006.
| ||||
---|---|---|---|---|
معلومات شخصيه | ||||
الميلاد | 27 يونيه 1350 | |||
الوفاة | 21 يوليه 1425 (75 سنة) | |||
مواطنه | امبراطوريه بيزنطيه | |||
الزوجة | هيلينا دراجس | |||
ابناء | يوحنا التامن باليولوج ، وديمتريوس باليولوج ، وقسطنطين الحداشر [1] | |||
الاب | يوحنا الخامس باليولوج [2] | |||
اخوه و اخوات | ||||
معلومات تانيه | ||||
المهنه | سياسى ، وكاتب | |||
اللغات المحكيه او المكتوبه | روميه | |||
تعديل مصدري - تعديل |
اتولد مانويل بالايولوجوس فى سنة 1350 وقت ظروف صعبه كانت الامبراطوريه البيزنطيه اللى عانت فتره طويله من الحروب ضد السلاجقه و النورمان و الصليبيين و الاتراك العثمانيين انكمشت حدودها بدرجه كبيره. وقت ما اتولد مانويل الجزء اللى فضل من الامبراطوريه و اللى كان من ضمنه العاصمه كونستانتينوبوليس Konstantinoupolis ( قسطنطينيه) كان بيواجه خطر كبير من العثمانيين.
مانويل كان الابن التانى للامبراطور جون الخامس بالايولوجوس John V Palaiologos و الامبراطوره هيلينا كاتاكوزينا Helena Katakouzene بنت الامبراطور جون الساتت كانتاكوزينوس John VI Kantakouzenos.
مانويل ماكانش ولى عهد الامبراطوريه لكن اخوه الكبير اندرونيكوس الرابع بالايولوجوس Andronikos IV Palaiologos لكن فى سنة 1373 مانويل بقى وريث العرش البيزنطى بعد ما اخوه اندرونيكوس قاد تمرد فاشل ضد ابوهم. مانويل اتنصب امبراطور-مشارك فى سبتمبر 1373 و فى سنة 1376 قدر اندرونيكوس انه يستولى على قسطنطينيه و عرش ابوه. فى سنة 1379 مانويل ساعد ابوه فى استرجاع عرشه و قسطنطينيه و ده كان بمساعدة الاتراك العثمانيين و ده خلاهم بقو خاضعين للسلطان العثمانى و بيدفعوله جزيه سنويه و بيدوه مساعدات عسكريه.
اندرونيكوس الرابع اتوفى سنة 1385 لكن فى سنة 1390 ابنه جون السابع استولى على قسطنطينيه و العرش فاتدخل الاتراك تانى و ساعدو مانويل و ابوه لكن ده كان فى مقابل ان مانويل اجبر على انه يروح يعيش فى بورصه تحت سيطرة السلطان العثمانى بايزيد الاول كخاضع ليه ففضل عايش هناك لغاية ماهرب على قسطنطينيه بعد ماسمع ان ابوه اتوفى فى فبراير 1391.
لما غزا الاتراك مناطق ثيساليا Thessaly و الموره Morea التابعين للامبراطوريه البيزنطيه سنة 1396 مانويل عمل رحله فى غرب اوروبا لطلب المساعده من الاوروبيين و استقبل بترحاب فى روما و ميلانو و لندن و باريس اللى عاش فيها سنتين. زيارته لغرب اوروبا كان ليها اثر فى انعاش العلاقات الثقافيه بين الغرب و بيزنطه لكن ماوصلتش لمساعدات عسكريه غير ان بابا الكاتوليك بونيفيس التاسع Boniface IX نادى بتنظيم حمله صليبيه و لم فلوس و طلب من الناس انهم يتطوعو لكن الحمله الصليبيه دى عمرها مااتشنت و فضل مانويل قاعد فى باريس لغاية مالظروف ساعدته بعد ماهاجم تيمورلنك الأناضول و قامت حرب بينه و بين الاتراك اللى اتغلبو واتأسر سلطانهم بايزيد فى معركة انقره و مات فى الاسر ، فرجع مانويل على قسطنطينيه و فى سنة 1403 عمل معاهدة سلام مع السلطان محمد الاول اللى خلف بايزيد. بالمعاهده دى استرجع مانويل ثيسالونيكى Thessaloniki و مابقاش يدفع جزيه للأتراك و فضلت العلاقات بينه و بين الاتراك سلميه لغاية وفاة السلطان محمد الاول سنة 1421 فسحب مانويل نفسه من الحياه السياسيه و كرس حياته لاهتماماته الدينيه و الادبيه.
جون التامن John VIII ابن مانويل اللى ادار شئون الحكم بالنيابه مااهتمش بالعلاقات اللى عملها ابوه مع الاتراك و فى سنة 1421 ساند تمرد واحد تركى اسمه مصطفى ضد مراد التانى اللى كان الوريث الشرعى لعرش الأتراك. مراد التانى قدر انه يخمد التمرد و فى سنة 1422 حاصر قسطنطينيه. حصار مراد لقسطنطينيه مانجحش لكن الاتراك استولو على بيلوبونيسا Peloponnese سنة 1423 و بعد ما مضا مانويل اتفاقيه مهينه مع الاتراك راح عاش فى دير و اتوفى فى 21 يوليه 1425.