Leishmaniasis
From Wikipedia, the free encyclopedia
Leishmaniasis (ojehaíva avei Leishmaniosis) térã Kurupochy, ha'e peteĩ mba'asy omoñepyrũva umi pyteha michĩgui ndojehecháiva, heñóiva upe meña "Leishmania-gui" ha oñemosarambíva peteĩ mbutu lája su'upy rupive.[1] Ko mba'asy ikatu ojetopa mbohapy lájaicha: pireguáva, ambyupireguáva ha tyekueguáva.[1] Upe pireguáva omoheñói ai pirére; upe ambyupireguáva omoheñói ai pire, juru ha tĩre; ha upe tyekueguáva katu ñepyrũrãme omoñeñói ai pirére ha upéi omoakãnundu, omboguejy tuguypyta'ĩ ha ombotuicha perevy ha ígado.[1][2]
Leishmaniasis (Kurupochy) | |
---|---|
Leishmaniasis pireguáva peteĩ karai Centroamérica-gua póre | |
Oñemohendaháicha | |
ICD/CIM-10 | B55 B55 |
ICD/CIM-9 | 085 085 |
DiseasesDB | 3266 |
MedlinePlus | 001386 |
Oĩ 20 ári "Leishmania" lája ikatúva ombohasy tapichakuérape.[1] Umi mba'e omosarambikuaavéva ko mba'asy ha'e hína: mboriahu, ñemongaru vai, yvyra jeity ha ogarã.[1] Ko'ã mbohapy lája ikatu oñehesa'ỹijo ojehechávo umi pyteha peteĩ mba'ehechaha'i guýpe.[1] Upéicha avei, pe mba'asy tyekueguáva ikatu oñehesa'ỹijo tuguy rupive.[2]
Leishmaniasis ikatu ojehapejoko'imi ojekévo ñati'ũ jokoha guýpe, oñepohãnova'ekue vícho jukaha ndive.[1] Ikatu avei ojehypýi umi mbutu vícho jukaha ndive ha oñepohãno mayma hasýva oñemosarambive mboyve pe mba'asy.[1] Ñepohãnopuku oñeikotevẽva oñehekome'ẽ ojehechakuaávo moõpa oñembohasa raka'e pe mba'asy, mba'e lájapa upe "Leishmania" ha mba'e lájapa upe pámo.[1] Ko pohã ojeipuru jepi opa hag̃ua pe mba'asy tyekueguáva: Anfotericina B Liposomal,[3] Antimonial Pentavalente ha Paromomicina jopara,[3] ha Miltefosina.[4] Mba'asy pireguávape g̃uarã katu upe Paromomicina, Fluconazol térã Pentamidina ikatu ou porã.[5]
Ko'ág̃a rupi, 12 sua tapicháma oguereko ko mba'asy[6] 98 tetãme.[2] Opa ary, ojetopa 2 sua tapicha hasýva[2] ha 20-50 su omanóva.[1][7] Avei, 200 sua tapicha oĩva Asia, África, Sudamérica, Centroamérica ha Europa ñemby gotyo rupi oiko umi tenda oñemosarambiháme manterei upe mba'asy.[2][8] Upe Tesãi Arapygua Atyguasu rupive umi pohã hepyve'ỹ ñepohãnopukurã.[2] Heta mymba ikatu oguereko ko mba'asy; ko'ãva apytépe oĩ jagua ha mymba oñapi'ũva.[1]