Roma
From Wikipedia, the free encyclopedia
Roma ye la capital de la Eitália i sede de la quemuna i de la porbíncia cul mesmo nome, na region de l Lhácio. Coincida anternacionalmente cumo La Cidade Eiterna pula sue stória milenar[1], Roma spalha-se pulas bordas riu Tibre, cumprendendo l sou centro stórico culas sues siete colinas: Palatino, Abentino, Campidoglio, Quirinale, Biminale, Squelino, i Celio. Segundo l mito romano, la cidade fui fundada a cerca de 753 a.C.[2]. (data cumbencionada) por Rómulo i Remo, dous armanos criados por ua lhoba, que son atualmente simblos de la cidade. Zde anton tornou-se ne l centro de la Roma Antiga (Reino de Roma, República Romana, Ampério Romano) i, mais tarde, de ls Stados Puntifícios, Reino de Eitália i, por fin, de la República Eitaliana.
Ne l'anterior de la cidade ancontra-se l stado de l Baticano, residéncia de l Papa. Ye ua de las cidades cun maior amportança na Stória mundial, sendo un de ls simblos de la ceblizaçon ouropeia[3]. Cunserba einúmaras ruínas i menumientos na parte antiga de la cidade, specialmente de la época de l Ampério Romano, i de l Renacimiento, l mobimiento cultural que naciu na Eitália.
La ária metropolitana ten cerca de 2.546.804 habitantes (2001)[4], i stende-se por ua ária de 1.285 Km², tenendo ua densidade populacional de 1.981 hab/Km², l que a torna na maior cidade de la Eitália[4] i tamien na capital ouropeia de maiores dimensones. L persidente de la cámara (Sindaco) an 2008 ye Gianni Alemanno.