Terabada
From Wikipedia, the free encyclopedia
L Terabada (de l páli thera, "ancianos" i bada, "palabra, doutrina" , "Doutrina de ls Ancianos")[1] ye la scuola budista mais antiga i biba até hoije. Eilha atribui sou ampeço als própios ansinamientos de l Buda atrabeç de ls testos de l Cánone Páli (Tipitaka) i nun cunsidra canónicas las scrituras adotadas pulas scuolas Maaiana i Bajrayana.
L Terabada ye ua de las binte scuolas que aparecírun ne ls primórdios de l budismo. Nacida de la debison de la quemunidade monástica ne l Purmeiro Cuncílio budista, cien anhos apuis de la muorte de l Buda, ye la sola que se mantén biba até hoije. Las outras scuolas aparecírun atrabeç de mesclaiges, adataçones i reanterpretaçones de ls cunjuntos doutrinales de ls purmeiros seclos. Por se mantener fiel al Cánone Páli, l Terabada ye cunsidrado la mais ourtodoxa de las scuolas.
Alguas bezes l Terabada ye andebidamente chamado de scuola Hinaiana, l que eitimologicamente ye ua palabra peijoratiba ("pequeinho beiclo"). L mal-antendido eisiste de l erro de anterpretaçon de alguns testos antigos que citában las scuolas, Sarbastibada i Sautrantika, cumbatidas por un mobimiento filosófico eimergente na época, l qual se outointítalou Maaiana ("grande beiclo"). Ls purmeiros studiosos oucidentales pensában que l Terabada, por ser ua scuola antiga, la sola que chegou als dies de hoije, serie la chamada scuola Hinaiana. Anque pesquisas stóricas atuales yá tenéren negado tales suposiçones, muitos cunténan mantenendo tales eideias eirradas.
Ls percipales países adonde esta scuola stá difundida son, percipalmente: Sri Lhanka, Tailándia, Mianmar, Laos, Camboja i Vangladesh. Sue persença ye spressiba an países cumo Bietname i Malásia. An décadas recentes l Terabada ampeçou a alicerçar sues raízes ne l Oucidente, cumo ne ls Stados Ounidos de la América i Anglaterra. Atualmente l númaro de budistas desta scuola an todo l mundo scede 100 milhones de pessonas.