Tresena revolucion industriala
From Wikipedia, the free encyclopedia
L’expression « tresena revolucion industriala » (TRI), popularizada per Jeremy Rifkin designa una novèla revolucion industriala e economica que se diferenciariá dels concèptes dels sectors d'activitat classics de la produccion e auriá començat al mitan del sègle XX amb lo desvelopament de las tecnologias de l'informacion e de la comunicacion.
Dins son analisi prospectiva, Rifkin la jutja necessària e urgenta per entre autre respondre a la diminucion de la produccion de petròli e per una transicion cap a un desvolopament mai sostenable obligant a una « economia descarbonada » (produsent mens de gases d'efièch de sèrra). En efièch, aquela revolucion seriá fondada sus una produccion d'energia pas mai « centralizada », mas « distribuïda », l'energia circulant dins lo malhum de biais « intelligent », un pauc coma l'informacion circula dins l'Internet[3].
Dempuèi 2006, Rifkin prepausa aquela revolucion coma vision estrategica a las entrepresas, als Estats e a l'Union Europèa. Permetriá de respectar (e passar) los engatjaments mondials al subjècte de luta contra lo rescalfament climatic (Protocòl de Kyoto, eca)[2]. Tanben permetriá, segon el, una gestion mai durabla de las fonts e una subrevida de l'economia (via una economia diferenta, après una fasa de transicion). Evitariá a tèrme cort la prolongacion de las crisis petrolièras e l'agravacion o lo retorn de la crisi de 2008. A tèrme mejan o long, es per J. Rifkin la darrièra e sola solucion per evitar un esfondrament global e durable de l'economia mas tanben un collaps global incluissent un collaps ecologic; es una responsa a çò que nomena «la factura entropica de l'edat industriala»[4].
L'enjòc es tanben la subrevida dels ecosistèmas e donc de l'umanitat que ne despend e Rifkin vei pas de « Plan B »[1]. Acaba de venir possible pels progrèsses de las Novèlas tecnologias de l'informacion e de la comunicacion (NTIC) mas demòra de la realizar.
En 2007, lo Parlament Europèu adoptèt oficialament aquel vejaire[5].