嚴勵行
From Wikipedia, the free encyclopedia
嚴勵行(粵拼:jim4 lai6 hong4;英文:Johnny Yim)係香港流行歌曲作曲人同編曲人,歌曲監製、做過演唱會音樂總監等幾項工作。
佢讀過聖若瑟書院,中學同大學時代留學加拿大約克大學,主修數學。由6歲開始學鋼琴彈奏古典樂曲,到今日自學做咗流行歌曲監製,過程唔順利。2001年,佢畢業後返香港希望從事音樂事業,但遭遇滑鐵盧,轉去蘋果電腦工作。同時亦幫演藝學院跳舞班彈奏同喺廣告公司從事外聘配樂工作。雖然一人做3份工,但從冇諗過放棄做音樂事業嘅理想,亦喺工餘時間開始作曲,2004年憑《黑洞》攞咗「第十六屆Cash流行歌曲創作大賽」冠軍而開始佢嘅音樂事業生涯。
初期佢以編曲為主,到依家編曲作品過幾百首而被叫做「編曲俠」。近年除編曲外,重做創作,歌曲監製同演唱會音樂總監等幾項工作。
2008年8月,佢同張敬軒喺「903 ID Club拉闊變奏廳」首次合作,就結下合作之緣,重一直做佢演唱會音樂總監到依家。2011年,佢做張敬軒喺九龍展貿中心Star Hall一連3日舉行嘅「港樂X張敬軒交響音樂會」音樂總監,同80人交響樂團合作。
佢喺「2009年度十大勁歌金曲頒獎典禮」憑幫林峯編曲嘅《如果時間來到》攞咗「最佳編曲獎」。2012年再喺「第34屆十大中文金曲頒獎音樂會」憑同張敬軒一齊作曲嘅《PS. I love you》攞咗「優秀金曲作曲獎」同幫蘇永康編曲嘅《那誰》攞咗「全球華人至尊金曲獎」。
另外,佢亦喺「2012年度十大勁歌金曲頒獎典禮」憑幫鍾嘉欣編監嘅《預防針》攞咗「最佳歌曲監製獎」。
2014年,佢幫北京上演嘅「愛上鄧麗君」音樂劇做編曲總監。
譚詠麟入行四十週年喺斯洛伐克灌錄嘅大碟「銀河歲月」,都係由佢負責監製同編曲。
佢喺商業電台2014年度叱咤樂壇流行榜頒獎典禮入面攞到「叱咤樂壇編曲人大獎」。
2015年1月開始做香港電台第二台嘅廣播節目「這裡找共鳴」嘉賓主持,邀請對自己有影響嘅嘉賓做清談訪問。10月5號晚駕駛跑車撞到1部的士、衝上行人路同撞倒交通指示牌[1]。