星雲
From Wikipedia, the free encyclopedia
星雲(粵拼:sing1 wan4;英文:nebula,類似粵拼:ne6 bu1 laa4)係由宇宙塵以及氫同氦等電漿夾埋形成嘅星際雲,當中一嚿星際雲係太空星際空間入面嘅一團塵埃同氣體。喺廿世紀前,星雲呢隻詞曾經俾人用嚟指「任何瀰漫嘅天體」,包括銀河系以外嘅星系都俾人叫做星雲。但自從廿世紀初開始,天文學科研上嘅進步加深咗人類對星雲嘅了解,所以到咗今日,一個天體一定要有齊宇宙塵同電漿等嘅成份,先至會俾人歸類做星雲[2][3]。
星雲好巨大,但密度好低[4][5]:例如獵戶座大星雲直徑有 24 光年[註 1][6],但佢以星雲嚟講查實係比較細嘅,而大啲嘅星雲直徑閒閒哋可以有成幾百光年咁長[7];同時,星雲嘅平均密度又低得好交關,一般仲低過喺地球上創造得到嘅真空。根據天文學家計算,一嚿典型嘅星雲如果密度唔變,但容量縮到好似地球咁大嘅話,佢嘅質量會得嗰幾公斤重[8][註 2]。
星雲好多時係恆星誕生嘅空間,例如鷹星雲嘅創生之柱就係噉:喺星雲當中,分得散修修嘅氣體、星塵、同第啲物料會慢慢噉(經過幾億年嘅時間)因為萬有引力互相吸引,然後黐埋一齊,形成密啲嘅天體;當一啲密啲嘅天體形成,佢哋又會靠自己嘅萬有引力再吸引多啲物料,而最後如果一嚿因為噉而形成嘅天體質量夠大,佢就可以變成行星或者恆星等嘅物體[9]。