音樂
From Wikipedia, the free encyclopedia
音樂(粵拼:jam1 ngok6)係一種有組織嘅聲,涉及作曲嘅人喺時間當中編作聲[1]-一首音樂會通過運用音高、和音、節奏、旋律同音色等嘅元素嚟安排一段段嘅聲,務求令聽嘅人有賞心悅耳嘅感受。音樂理論上嘅研究會對呢啲唔同嘅音樂元素作出分析,嘗試了解唔同嘅音樂元素組合會點樣影響一首音樂「有幾好聽」[2]。
對於人類嚟講,音樂不嬲都係文化嘅重要一環:音樂可以係一門藝術,會由美學嘅角度嚟思考一段聲點樣先至算係「有美感」,而且好多人都會視聽音樂同演奏音樂做一種娛樂,由音樂當中得到樂趣[2];除此之外,音樂有陣時仲可以有藝術以外嘅文化意義,例如著名芭蕾舞劇《合桃鉗》當中嘅樂曲就俾好多人同聖誕節聯想埋一齊,所以喺北美洲等地,好多人一到聖誕就會攞《合桃鉗》當中嘅樂曲嚟周圍播,營造聖誕氣氛[3]。又有啲音樂會俾人攞嚟做重要儀式嘅一部份。
音樂同舞蹈之間嘅關係極之密切:喺廿一世紀初,絕大多數嘅舞種傳統上都係會跟住音樂嚟跳嘅-跳舞嘅人都會想用音樂;而事實亦表明,人喺聽到音樂嗰時,成日都會不自覺噉身體某啲部份(例如腳板)開始跟住音樂嘅節奏郁動-音樂自然令人想跳舞[4]。