Sturm und Drang
From Wikipedia, the free encyclopedia
Sturm und Drang sa numna in moviment entaifer la litteratura tudestga dal temp da l’illuminissem. Quel ha circa durà dal 1765 fin il 1785 ed è surtut vegnì purtà da giuvens auturs tranter 20 e 30 onns. Pervi da la «glorificaziun dal ‹scheni original› sco prototip da l’uman ed artist avanzà» (Gero von Wilpert)[1] vegn quest moviment er numnà ‹temp dal scheni› u ‹perioda dal scheni›.
La denominaziun ‹Sturm und Drang› è pir sa furmada en ils onns 1820. Ella va enavos sin la cumedia scritta il 1776 e publitgada il 1777 ‹Sturm und Drang› dal scriptur tudestg Friedrich Maximilian Klinger ed uschia la finala sin l’«apostel dal scheni» Christoph Kaufmann (1753–1795) da Winterthur. Quel aveva insistì che Klinger duaja dar a ses toc da teater quest num, enstagl dal titel oriund ‹Wirrwarr›.